अपनेक स्वागत अछि।

Monday, September 26, 2011

कलर्स पर हवन

कलर्स चैनल पर आई सं हवन सीरियल शुरू होमय जा रहल अछि। आस्था केर इर्द-गिर्द बनल एहि शो केर निर्माण राजन शाही कएने छथि। 
ई सीरियल छैक एक उपासक आओर एक गुरु (बापजी) के बीच संबंध आ तकर मध्य मौजूद असंख्य मानवीय भावना केर। किस्मत, सफलता आ कि नीक स्वास्थ्य पएबाक लेल  केओ स्टोन धारण करैत अछि तं केओ व्रत रखैत छैक। दिन विशेषक अनुसारें वस्त्र धारण करबाक मान्यता सेहो छैक। हम सभ एहि सभ देया साइते कोनो सवाल पूछैत छियैक। कारण ई जे लोक सभहक मोन मे एहि सभहक प्रतियें प्रबल आस्था पैदा भ चुकल छैक जे बहुत बेर ओकर हक में काज करैत छैक। एही सभ तरहक अनेक आस्था कें ल कए मनुष्य भगवानक शरणागति पएबाक इच्छा मोन मे रखैत छैक। 
ई धारावाहिक देखबैत छैक जे मानव मानसिकताक पृष्ठभूमि मे कोन तरहक तथ्य आओर आस्था काज करैत छैक। धारावाहिक केर नायक बापजी एक आध्यात्मिक चिकित्सक छैक जकरा मे अलौकिक शक्ति छैक आ लोक सभ ओकरा भगवान बना देने छैक जे सभ समस्याक उत्तर द सकैत अछि। 
हवन मे बापजी केर रोल मे छथि नरेन्द्र झा । साहिबा बापजी केर शांत पत्नी जानकी केर भूमिका मे छथि। पंकज सभ सं पैघ बेटा साम के किरदार मे अछि आ ओकर पत्नी तृष्णा केर रोल मे  शुभांगी। अतुल श्रीवास्तव बापजी के विश्वासपात्र चतुर्वेदीजी के भूमिका मे छथि आ बापजी केर पकिया भक्त आस्था के रोल नवआगंतुक श्रेणू कएन छथि।
प्रसारण संध्या सात बजे सं।

Friday, September 09, 2011

मिथिलांगनक हकार 11 सितम्बर कए


दिल्ली केर प्रख्यात सामाजिक-सांस्कृतिक संस्था- मिथिलांगन पछिला किछु बरख सं नामी साहित्यकार डाक्टर ब्रजकिशोर वर्मा मणिपद्म केर जयंतीक उपलक्ष्य मे कोनो ने कोनो कार्यक्रम करैत रहल अछि। एहि अवसर पर ई संस्था नैका बनिजारा(2007),उगना हाल्ट(2008),सामा चकेवा(2009) आ पछिला बरख छुतहा घैल नाटकक बहुचर्चित-बहुप्रशंसित आयोजन कएने छल। एहि बेर मिथिलांगन मैथिली कवि गोष्ठी केर आयोजन क रहल अछि।
ओना तं मैथिली-भोजपुरी अकादमी दिल्ली मे द्विभाषिक कवि सम्मेलन आयोजित करैत रहल अछि,मुदा ई पहिल बेर अछि जे दिल्ली मे कोनो संस्था मूलतः मैथिली कवि सम्मेलन कें आयोजन ल कए उपस्थित भेल अछि। आमंत्रित कविगण छथि-बिहार सरकारक फारेंसिक विभागक पूर्व अधिकारी डाक्टर ललित कुमुद,मिथिलाक महादेवीक रूप मे मशहूर डाक्टर शेफालिका वर्मा,मशहूर रवीन्द्र-महेन्द्र जोड़ी केर श्री रवीन्द्र नाथ ठाकुर,मैथिल शुभ-संस्कार आ विधि-विधान पर गीत लिखिकए अद्वितीय काज कएनिहार श्री ब्रह्मदेव लाल दास(मिथिलांगन हिनका पर मधुचंद्रिका नामक सीडी निकालि चुकल अछि),मैथिलीक सभ पत्रिका मे छपि चुकल (अंग्रेजियो मे प्रकाशित) नामी कवि श्री शारदान्द दास परिमल,मिथिलांगनक कर्ता-धर्ता आ अपन तुरंताक लेल प्रसिद्ध श्री रवीन्द्र लाल दास सुमन,नाटककार आ स्वतंत्र पत्रकार श्री कुमार शैलेन्द्र,हिंदुस्तान मे वरिष्ठ समाचार संपादक श्री मानवर्द्धन कंठ,अमर उजाला मे कार्यरत श्री रमण कुमार सिंह,राष्ट्रीय सहारा मे कार्यरत कवि-समीक्षक श्री विनीत उत्पल,दूरदर्शन मे कार्यरत,श्री किशन कारीगर,मिथिलांगन मे शारीरिक-बौद्धिक दुनू स्तर पर अत्यन्त सक्रिय श्रीमती विनीता मल्लिक आ हालहि मे लांच भेल समाचार चैनल न्यूज एक्सप्रेस मे कार्यरत आ नवोदित सुश्री स्तुति नारायण।
स्थान रहत सत्याग्रह मंडप,गांधी दर्शन,निकट राजघाट आ समय सांझ छओ बजे।
आउ,मिथिलांगनक हकार स्वीकार कए, सभ आयुवर्गक आ बहुविधप्रतिभा संपन्न कवि लोकनि कें सुनैत मैथिली कवि-गोष्ठीक आनंद ली।